RUS
SMARTNEWS.KZ басылымының хабарлауынша, Ұлттық мұражай Скиф дәуіріне тиесілі сирек артефактілермен толықты. Олар бұрын олигархтан тәркіленген, нақтырақ айтқанда, барлық айғақтар бұл заттардың Қайрат Сатыбалдыға тиесілі екенін көрсетіп отыр.
Б.з.д. VII ғасыр мен б.з. III ғасыры аралығына жататын бұл бұйымдар енді ресми түрде Ұлттық музейдің тұрақты қорына өткізілді.
Музейге тапсырылған жәдігерлер тізімі:
бүркіт бейнеленген металл мүсінше;
араб жазуы бар алтын сақина;
мүйізді аң бейнеленген бедерлі тақта;
қанатты арыстан, қанатты ат, жүгіріп бара жатқан барыс және секіріп тұрған бұғы мүсіндері;
15 дана ежелгі монета;
екі спираль тәрізді сақина және арыстан басы бар сақина.
Жинақтың жалпы салмағы 118 грамнан асса да, мәдени және тарихи құндылығы әлдеқайда жоғары. Артефактілерді жасау барысында ежелгі шеберлер бедерлеу, гравюра және соғу техникасын қолданған. Бұл әдістердің күрделілігі мен дәлдігі қазіргі заманауи зергерлерді де таңғалдыруда. Жинақтан дала өркениетінің, сондай-ақ грек-парсы және шығыс өнерінің ықпалын байқауға болады.
Айта кетейік, бұрын 136 мың теңгеге бағаланған араб жазуы бар сақина мемлекеттік мүлік аукционында сатылымға шығарылған болатын. Ол кейіннен «Қайтарылған активтерді басқару» компаниясы арқылы мұражайға тапсырылды.
Еске салайық, бұған дейін Нұрсұлтан Назарбаевтың жиені Қайрат Сатыбалдыдан люкс сағаттар мен зергерлік бұйымдардың ірі коллекциясы тәркіленген болатын. Бұл бұйымдардың бір бөлігі оның ресми шараларда түскен суреттерінен анықталған еді.