RUS
SMARTNEWS.KZ басылымының хабарлауынша, Қарағанды облысында жүк пойызы екі жасар баланы қағып кетті. Қазір сәби ауыр жағдайда жансақтау бөлімінде жатыр. Бұл туралы облыстық денсаулық сақтау басқармасы мен «Қазақстан темір жолы» компаниясы мәлімдеді.
Оқыс оқиға 1 маусым күні сағат 11:47-де «Қарағанды — Ақадыр» теміржол учаскесінің Қарағанөзек — Қарабас аралығында болған.
«Екі жасар бала теміржол жолына шығып кеткен. Машинист шұғыл тежегіш қолданғанымен, соқтығысудың алдын алу мүмкін болмады», – деп хабарлады «Қазақстан темір жолының» баспасөз қызметі.
Зардап шеккен бала дереу облыстық балалар ауруханасына жеткізіліп, жансақтау бөліміне жатқызылған.
Қазір аталған факті бойынша «Қарағанды-Сортировочная» стансасының желілік полиция бөлімшесі тергеу жүргізіп жатыр.