RUS
SMARTNEWS.KZ басылымының хабарлауынша, Эстрада әншісі Мөлдір Әуелбекова Шымкент қаласында өтетін “Той-думан” радиосының фестиваліне қатысты ашық мәлімдеме жасап, өнер адамдарының ақысыз қатысуына қарсы екенін айтты. Оның айтуынша, қала әкімдігі іс-шараны өткізуге 300 миллион теңге бөлген.
“‘Той-думан’ радиосының фестивалі өтеді екен. Шымкент 300 миллион теңге бөліпті. Әншілерге тегін қатысыңдар деп хабарласып тұр. Мен қарсымын. Көрермен әншіге келеді. Неге әншінің еңбекақысын төлемейсіздер?!” – деп жазды әнші әлеуметтік желіде.
Әуелбекова бұл жағдайды өнер адамдарының еңбегі ескерілмейді деп бағалап, тегін концерттерді әділетсіздік деп санайды.
Алайда, “Той-думан” радиосы бұл ақпаратты жоққа шығарды. Радио өкілдерінің мәлімдеуінше, әншінің айтқаны шындыққа жанаспайды.
“Әуелі 200-300 миллион теңге деген соманы дәлелдеуіңізді сұраймыз. Шымкент қаласы әкімдігі фестивальді тек техникалық тұрғыда — алаңмен, өрт сөндірушілермен, полиция, жедел жәрдем сияқты қызметтермен қамтамасыз етеді. Бірақ сіз атап отырған сома ешқашан болмаған. Бұл жазбаңыз ‘Той-думан’ телерадиокорпорациясы мен Шымкент қаласы әкімдігіне қатысты жалған ақпарат таратып, халық арасында наразылық тудырып отыр. Әрі қарай бұл мәселе бойынша заңгерлеріміз байланысатын болады,” – делінген ресми мәлімдемеде.
Қазіргі таңда тараптар арасындағы дау желі қолданушылары арасында қызу талқыланып жатыр. Желіде пікір екіге бөлінді: бірі Әуелбекованы қолдаса, енді бірі концертті ұйымдастырушылардың уәжін орынды деп санайды.
