RUS
SMARTNEWS.KZ басылымының хабарлауынша, Астанадағы «7 бочек» тұрғын үй кешенінде орын алған өрттен кейін зақымданған қасбет пен өзге де шығындарды қалпына келтіру жұмыстары жедел түрде басталды. Бұл туралы қала әкімдігінің баспасөз қызметі хабарлады.
Өрт туралы қоңырау 4 маусымда түнгі сағат 00:26-да түскен. Қызыл жалын тұрғын үй кешенінің (Сығанақ көшесі, 23) сыртқы қаптамасын шарпыған. Оқиға орнына жедел жеткен Астана қаласының Төтенше жағдайлар департаменті (ТЖД), полиция департаменті (ПД) және қала әкімдігі бірлескен штаб құрды.
ТЖД мен ПД қызметкерлерінің үйлесімді жұмысының арқасында өрт дер кезінде сөндірілді. Абырой болғанда, зардап шеккендер мен қаза тапқандар жоқ.
Қала әкімдігінің мәліметінше, қажет болған жағдайда тұрғындар уақытша қала қонақүйлеріне орналастырылады. Сонымен қатар, әлеуметтік және материалдық көмек те көрсетіледі.
— Аталған үйдің зақымданған сыртқы қасбеті мен басқа да шығындары жедел түрде қалпына келтіріледі, — делінген ресми хабарламада.
Әкімдік өкілдері бұған дейін де осындай жағдайларда тұрғындарға толыққанды көмек көрсетілгенін еске салды. Мәселен, Бұланты көшесі, 14-үйдегі жатақханада болған өрттен кейін тұрғындар жаңа пәтерлерге көшірілген болатын.