RUS
SMARTNEWS.KZ басылымының хабарлауынша, «Шаңырақ» қоғамдық бірлестігінің басшысы Алмасбек Садырбай 1,2 млрд теңге көлеміндегі субсидияны жымқырды деген күдікпен қамауға алынды. Бұл туралы Бас прокуратура Kazinform сауалына берген жауабында мәлімдеді.
Қазір Садырбай Қазақстан Қылмыстық кодексінің 190-бабы 4-бөлігі 2-тармағы бойынша (аса ірі көлемдегі алаяқтық) күдікті ретінде тергеу изоляторында отыр. Бұл бап бойынша:
Қызмет бабын пайдалана отырып;
Ақпараттық жүйелер арқылы;
Мемлекеттік сатып алу саласында;
Адамдар тобымен сөз байласу арқылы жасалған алаяқтық қамтылады.
Егер сот оны кінәлі деп таныса, Садырбай:
10 жылға дейін бас бостандығынан айырылуы,
мүлкі тәркіленуі,
өмір бойына белгілі бір лауазымдарды атқару құқығынан айырылуы мүмкін.
Бастапқыда іс Қаржылық мониторинг агенттігі арқылы 189-баппен тергеліп жатқан, алайда кейін ҚПК-нің 194-бабы негізінде прокуратураның арнайы прокурорларына берілген. Себебі, бұл бапқа сәйкес, іс күрделі немесе бейтараптыққа сенім азайған жағдайда прокуратура тергеуді өз қолына ала алады.
Қазіргі таңда іс Алматы облысы прокуратурасының арнайы басқармасында тергеліп жатыр. Тергеу мəліметтері ҚПК-нің 201-бабына сай жария етілмейді.