RUS
SMARTNEWS.KZ басылымының хабарлауынша, Алматы қаласының орталық мешітінің наиб-имамы Тимур Алиев қажылыққа немесе құрбандыққа бару мақсатында несие алу – шариғат нормаларына сай келмейтінін ресми түрде мәлімдеді. Бұл туралы ол өңірлік коммуникациялар қызметінде өткен баспасөз жиынында айтты.
Имамның айтуынша, Ислам дінінде адамның мүмкіндігінен тыс әрекеттерге баруға мәжбүрлеу – дұрыс емес. Сондықтан қаржылық мүмкіндігі жоқ адамның қажылыққа баруға тырысып, несие немесе қарыз алуына шариғат тұрғысынан рұқсат берілмейді.
“Алла Тағала адамның шамасынан тыс нәрсені жүктемейді. Егер адамның жағдайы болмаса, ол үшін жауап бермейді және күнә жазылмайды. Бұл қағида құрбан шалуға да, қажылыққа да қатысты”, – деді Тимур Алиев.
Имам қазіргі кезде кейбір мұсылмандардың қажылық пен умра сапарларын өтеу үшін несие алып, банктерден қарызға кіріп жатқанына алаңдаушылық білдірді.
“Қазір кейбір азаматтар умраға немесе қажылыққа бару үшін несие алады. Бұл дұрыс емес. Мұндай әрекетке шариғат рұқсат бермейді. Себебі қажылық – тек қаржылай және физикалық мүмкіндігі бар адамға ғана парыз, ал қалғандары үшін ол – нәпіл, яғни орындалмаса күнә емес”, – деді наиб-имам.
Исламда қажылық – діннің бес парызының бірі болғанымен, оған бару міндеті тек мүмкіндігі бар адамға жүктеледі. Яғни, егер адамның денсаулығы немесе қаржысы қажылыққа жетпесе, ол бұл парыздан босатылады.
Сарапшылар да бұл пікірмен келіседі. Қоғамда исламдық қаржыландыру немесе пайызсыз несие деген түсініктер пайда болғанымен, олар қажылық үшін несие алудың шешімі емес екенін ескертеді. Оның орнына, адамдар қажылыққа дайындықты ұзақ мерзімді жоспар ретінде қарап, ақша жинап барып орындағаны абзал.