RUS
SMARTNEWS.KZ басылымының хабарлауынша, Түркістанда өткен ерекше той әлеуметтік желіде қызу талқыға түсті.
63 жасқа толған ер азамат пен оның жары мейрамханаға қайықпен кіріп, жұрттың назарын аударды. Алайда тойдағы бұл ерекше "шоу" баршаға бірдей ұнай қоймады.
Желі қолданушылары тойдың "шектен шыққан креатив" екенін айтып, мұндай дарақылыққа жол беруге болмайтынын жазуда. Бірқатары бұл көріністі "Титаниктегі Джек пен Роуздың сценариі" деп келеке етсе, енді бірі "теңіз жоқ жерде қайықпен жүру – цирк" деп сынады.
“Ұшатын тәрелкемен кірсе де таңғалмаймын”, “Қазақтар, шығармайтындарың жоқ. Не болса да ұят қой”, “Цирк. Асабаның ойлап тапқаны шығар, оған да ақша төлейді” – деген секілді пікірлер желіде жиі кездесуде.
Бірақ барлығы бірдей той иелерін айыптаған жоқ. Кейбір қолданушылар бұл әрекетті өмірдің өзенін бірге жүзіп өткен ерлі-зайыптылардың символикалық қадамы ретінде қабылдаған:
“Әдемі. Қазір екінің бірі ажырасып жатыр, ал бұлар бірге қартая білген жандар”.
Қайықпен кіру идеясы асабанікі болуы мүмкін деген болжамдар айтылып жатыр. Айта кетейік, соңғы жылдары елімізде ерекше той трендке айналып, "есте қаларлық шоу жасау" жарысы белең алып барады.