Экология министрлігінде 8 қызметкер жемқорлық үшін сотталған

SMARTNEWS.KZ басылымының хабарлауынша, 2024 жылы Экология және табиғи ресурстар министрлігі мен оның бөлімшелеріндегі жемқорлық фактілері бойынша 15 қылмыс тіркеліп, 8 қызметкер сотталды. Бұл туралы Сыбайлас жемқорлыққа қарсы іс-қимыл агенттігі мәлімдеді.

Агенттіктің Kazinform сауалына берген жауабында:

"Бұл қылмыстарды жасауда 9 адам әшкереленді. Мемлекетке келген залал – 167,3 млн теңге, оның 45 миллионы ғана қайтарылды", – делінген.

Еске салсақ, бұған дейін "Бөкейорда" табиғи резерватының басшысы жемқорлық күдігіне ілінгені хабарланған болатын.

Сонымен қатар агенттік "Ертіс орманы" мен "Семей орманы" резерваттарына сыртқы талдау жүргізіп, салада жүйелі жемқорлық тәуекелдерін анықтаған. Нәтижесінде арнайы Жол картасы бекітіліп, экология саласындағы жемқорлықпен күресуге бағытталған ведомствоаралық кеңес өткен.

"Министрлікке ішкі талдау жүргізіп, тәуекелдерді азайту ұсынылды", – деп қосты Антикор өкілдері.