RUS
SMARTNEWS.KZ басылымының хабарлауынша, танымал әнші, эстрада жұлдызы Сәкен Майғазиев ұлының алдағы тойына қатысты тың мәлімдеме жасады. Өнер иесі бұл қуаныш сәтін көпшілікпен бірге атап өту үшін тойды тікелей эфирде көрсетуді жоспарлап отырғанын айтты.
"Аллаға шүкір, той жасауға шамамыз жетеді. Бірақ осыншама адамның тілектес болатынын, атсалысатынын үш ұйықтасам, түсіме де кірмепті. Жүздеген адам хабарласып, ‘біз де қатысқымыз келеді’, ‘жай тойда жүрейікші’ деп жазып жатыр. Мейрамхана 700-800 адамға ғана арналған. Бірақ сыртта қалып жатқан, тек тілектестік танытқысы келетін жандар көп", – деді ол.
Әншінің айтуынша, бұл шешім халық арасындағы қызығушылыққа жауап ретінде қабылданған.
"Сондықтан тойды тікелей эфирде көрсетсек пе деп отырмыз. Әрине, оған тіркелу керек болатынын алдын ала ескертеміз", – деп мәлімдеді Майғазиев.
Сонымен қатар ол әлеуметтік желідегі жағымсыз пікірлерге де тоқталды:
"‘Сенің тойың кімге керек?’ деп жазып жатқандар бар. Бірақ ондай пікірлерге менің иммунитетім қалыптасқан. Шын ниетпен қатысқысы келетіндер өте көп", – деді ол.