RUS
SMARTNEWS.KZ басылымының хабарлауынша, Шерзат Болаттың өліміне қатысты сот үкімін 40-тан астам елдің көрермені онлайн тамашалады. Бұл туралы сот отырысының онлайн-трансляциясын ұйымдастыру тобының жетекшісі Перизат Сәдуақас-Хайруллина Facebook парақшасында хабарлады.
Сот процесі 2025 жылдың 10 сәуірінде басталып, екі ай бойы Жоғарғы Соттың YouTube арнасында тікелей эфирде көрсетілді. Осы уақыт аралығында 36 трансляция жүргізіліп, жалпы ұзақтығы 80 сағаттан асты.
"Үкім оқылған күн ерекше ауыр әрі эмоцияға толы болды", — деп жазды Перизат Сәдуақас-Хайруллина.
YouTube-тағы тікелей эфирлердің жалпы қаралымы 1 миллионнан асқан. Көрермендердің 58,3 пайызы — әйелдер, ал 41,7 пайызы — ерлер. Негізгі аудиторияны 25–34 жас аралығындағы көрермендер құраған. Сонымен қатар 13–17 жас аралығындағы көрермендер де тіркелген.
Трансляцияны Қазақстанмен қатар 42 елден, оның ішінде Өзбекстан, Қырғызстан, Ресей, Қытай, Түркия, АҚШ, Канада, Германия, Жапония, БАӘ және Австралия сияқты мемлекеттерден де көрген.
Онлайн көрсетілім қоғамның сот процесіне деген жоғары қызығушылығын және әділеттілікті ашық бақылауға деген сұранысты көрсетті.