RUS
SMARTNEWS.KZ басылымының хабарлауынша, белгілі әнші Сәкен Майғазиевтің ұлының үйлену тойы төңірегіндегі онлайн-трансляция жұрт назарын аударды. Себебі бұл – ақылы форматта ұйымдастырылып отырған алғашқы «цифрлық той». Тойды тамашалағысы келгендер жабық Telegram-арнаға 1380 теңге төлеп қосыла алады.
Бұл бастама қоғамда пікірталас туғызып, Мемлекеттік кірістер комитетінің де назарына ілікті. Комитет түсіндірмесінде көрсетілгендей, мұндай жағдайда қызмет көрсету үшін ақы алу – заң жүзінде кәсіпкерлік қызмет болып есептеледі.
«Егер онлайн-трансляция ұйымдастырушысы жеке кәсіпкер не заңды тұлға ретінде тіркелсе, түсетін табыс міндетті түрде декларацияланып, салық төленуі тиіс», – делінген комитеттің жауабында.
Заң бойынша:
Егер ұйымдастырушы арнайы салық режиміндегі шағын бизнес субъектісі болса – 3%;
Жеке кәсіпкер – 10%;
Заңды тұлға болса – 20% мөлшерінде салық төлеуге міндетті.
Бұл ереже тек онлайн-тойға емес, той бизнесіне қатысы бар барлық қызмет түріне қатысты: мейрамханалар, асабалар, музыканттар мен шоу-бизнестегі ұжымдар да салық заңнамасына бағынуы тиіс.
Онлайн-той жобасын ұйымдастырып жатқан продюсер Жан Мұқанов бұл бастама ашық әрі заң аясында өтіп жатқанын айтады. Оның сөзінше, той иелерінің бұл табысқа еш қатысы жоқ.
«Билеттерді сату, қаржы есептері, салықтық рәсімдер – барлығы ұйымдастырушы компанияның жауапкершілігінде. Той иелері бұл процестен бөлек. Бұл – мәдени форматтағы, шығармашылық жоба», – деді ол.
Продюсердің айтуынша, бұл баға – табыс табу емес, техникалық шығындарды өтеу үшін қойылған ең төменгі шек.
«Көрермен төлейтін 1380 теңге жалпы шығынның аз ғана бөлігін жабады. Біз кәсіби түсірілімге, режиссураға, дыбыс пен жарыққа, тікелей эфир платформасына, монтаж бен қауіпсіздік жүйелеріне айтарлықтай қаражат жұмсаймыз», – дейді Мұқанов.