RUS
SMARTNEWS.KZ басылымының хабарлауынша, Германияда қаза тапқан қазақстандық экс-судья Айгүл Сайлыбаеваның өліміне қатысты тергеу жалғасуда. Қазақстанның Сыртқы істер министрлігі бұл іске байланысты ресми түсініктеме берді.
Министрліктің мәліметінше, неміс құқық қорғау органдары кісі өлтіру фактісі бойынша қылмыстық іс қозғаған. Айгүл Сайлыбаеваның өліміне басты күдікті ретінде оның енесі — 49 жастағы Наталья Донцова танылып отыр.
"Дармштадт қалалық сотының шешімімен күдіктіге қатысты тұтқынға алу туралы ордер шығарылды. Қазір ол халықаралық іздеуде", – деді ҚР СІМ ресми өкілі Айбек Смадияров.
СІМ тергеу мүддесі үшін тергеу барысындағы толық ақпаратты жариялауға болмайтынын айтты. Сонымен қатар, іс материалдары марқұмның туыстары мен адвокатына Қазақстанның Германиядағы елшілігінің көмегімен берілген.
Айта кетейік, Айгүл Сайлыбаева 2024 жылдың 4 маусымында Германияда із-түссіз жоғалып кеткен. Ол таңертең баласын балабақшаға апарғаннан кейін байланысқа шықпаған. Он күн өткен соң, оның мәйіті полиэтилен пакетке оралған күйде табылды.
Дәл сол күні Сайлыбаеваның енесі Наталья Донцова немересін балабақшадан алып кеткен соң, өзі де ізім-ғайым жоғалып кеткен. Қазірге дейін оның қайда екені белгісіз.