RUS
SMARTNEWS.KZ басылымының хабарлауынша, Шымкенттегі "Ай Көркем" жекеменшік балабақшасында тәрбиешінің көмекшісі 3 жасқа толмаған баланы ұрып, тепкіледі. Бұл туралы жәбірленуші баланың анасы Салтанат Есіркепова Threads әлеуметтік желісінде хабарлады.
Оның айтуынша, бала сызғышпен бетінен бірнеше рет ұрылып, тепкіленіп, еденге құлатылған. Бейнебақылау жазбалары арқылы осы әрекеттер толық дәлелденген.
“Ұлымның дауысы қарлығып қалған. Видеодан қарасақ, ол еденде ес-түссіз жатқан. Ал тәрбиешілер оның жағдайын ‘жақсы’ деп айтып отырды”, – дейді анасы.
Кейін балабақша қызметкері басшылық тарапынан оқиғаны жасыру туралы қысым болғанын да айтты. Видеоайғақтарда мекеме меңгерушісінің күтушіге “ата-ананың көзінше спектакль ұйымдастырып, кейін жұмыстан кет” дегені жазылған.
Балабақша меңгерушісі Нұргүл Мамашарипова оқиғаны растады. Қызметкер жұмысынан босатылғанын мәлімдеді:
“Ереже бұзған мамандарға біздің мекемеде орын жоқ”, – деді ол.
Қазіргі таңда аталған факт бойынша тексеріс жүргізіліп жатыр.