RUS
SMARTNEWS.KZ басылымының хабарлауынша, Қарағандыда жаңа туған сәбилерді сату-сатып алу дерегі бойынша сот процесі жүріп жатыр. Қылмыстық іске балалардың биологиялық анасы, перзентханадағы медбике және екі отбасы тартылған. Бұл туралы КТК арнасы сот залынан жеткізді.
Іс материалдарына сүйенсек, 2022 жылы көпбалалы әрі жесір әйел дүниеге сәби әкеліп, оны перзентсіз отбасыға берген. Бұл процесте қалалық перзентхананың медбикесі делдал болған. Сол схема 1,5 жылдан кейін тағы қайталанып, келесі бала екінші ерлі-зайыптыға берілген.
Тергеу бастапқыда баланың биологиялық анасына 3 миллион теңге төленгенін мәлімдеген. Алайда кейін бұл әрекет "сыйға тарту" бабына ауыстырылған. Екі жағдайда да “әкесі” ретінде болашақ асырап алушының аты құжатқа енгізіліп, жалған ДНҚ сараптамасы жасалған.
Мемлекеттік айыптаушы Нұрбек Құзбақовтың айтуынша, мұндай әрекеттер бала құқықтарын қорғауға бағытталған заң талаптарын айналып өту болып саналады.
— Перзентханадағы медбике мен екінші отбасы кінәсін мойындамай отыр. Олар "балаға жақсы өмір тілеп, балалар үйіне түсірмеу үшін солай істедік" деген уәж айтады, — дейді адвокат Алмас Абдақасов. — Бірақ бұл әлеуметтік миссия емес, заңбұзушылық.
Қыз бала асырап алған ерлі-зайыпты кінәсін мойындады. Қазір олар сот шешімін күтіп отыр. Тергеу кезінде бүлдіршін бейімдеу орталығына жіберілген. Адвокат Ирина Маленконың айтуынша, орталықтағы ауыр ахуал баланың психикасына зиян келтіріп, тіпті екі жасында шашы ағарып кеткен. Психологтар бұл жағдайды «қорлықтан туған күйзеліс» деп бағалаған.
Прокурордың талабы бойынша:
Кінәсін мойындаған отбасы мен баланың биологиялық анасына — 8 жыл шартты жаза;
Медбике мен кінәсін мойындамаған екінші отбасыға — 9 жыл бас бостандығынан айыру жазасы сұралды.
Сот үкімі әлі шыққан жоқ.