RUS
SMARTNEWS.KZ басылымының хабарлауынша, әнші Сәкен Майғазиев ұлының үйлену тойына келетін қонақтарды іріктеп, 100-ге жуық адамды тізімнен қысқартуға мәжбүр болғанын мәлімдеді.
Той ұйымдастыру мәселесі оңай емес екенін айтқан өнер иесі, тойда тәртіп сақтау үшін мобилографпен бірге келетін әншілерді қабылдай алмайтынын жеткізді. Бұл туралы ол журналист Анна Данченкоға берген сұхбатында айтты.
"800 адамды басқару оңай емес. Оның ішінде 100-і әнші болса, әрқайсысы мобилографпен келсе, ол жерде хаос басталады. Той ұйымдастырушылары мұндай жағдайда тәртіп сақталмайтынын айтты. Сондықтан көп әріптесімнің көмекшілеріне, мобилографтарына 'Шарапат той жасап береді' деп қалжыңдап айтып жатырмын", – деді әнші.
Сәкен Майғазиев тойға келетін әншілер мен жұлдыздардың көңілін қимайтынын да жасырмады. Бірақ ұйымдастыру жұмыстарының шынайы күрделілігі осындай қадамға баруға мәжбүр еткен.
Сонымен қатар, бұл той ерекше форматта өтетінімен де көзге түсті – өнер иесі ұлы Әділет пен келіні Әдияның тойына онлайн қатысқысы келетіндер үшін арнайы ақылы стрим ұйымдастырған.
"Әділет пен Әдияның тойына онлайн қонақ болу үшін тіркеу басталды. Тіркелу құны – 1380 теңге", – деп жазды Майғазиев желідегі парақшасында.
Алайда бұл бастамаға Мемлекеттік кірістер комитеті де назар аударып, онлайн той арқылы табыс тапқан жағдайда салық төлеу қажет екенін ескертті.
"Егер іс-шараны ұйымдастырушы жеке кәсіпкер немесе заңды тұлға ретінде тіркелген болса, алынған табысты декларациялап, салық төлеуге міндетті", – делінген ресми хабарламада.