RUS
SMARTNEWS.KZ басылымының хабарлауынша, Шымкент қаласындағы №43 мектептің бас бухгалтері Айдана Мекемтас 13 миллион теңгеден астам қаржыны иемденгені үшін екі жылға бас бостандығынан айырылды.
Сот мәліметінше, 27 жастағы Мекемтас 2022 жылдың қаңтарынан бастап 2024 жылдың тамызына дейін 15 мұғалімнің жалақысын негізсіз артық есептеп, артық аударылған сома ретінде педагогтардан ақша жинап отырған. Бірақ бұл қаржы мектептің бюджетіне емес, өзінің жеке шотына аударылған.
Бұдан бөлек, мектепке қажетті заттар сатып алу үшін бөлінген қаражатты жеке кәсіпкердің атына аударып, кейін ол соманы да иемденгені анықталды.
Жалпы келтірілген залал — 13 миллион теңгеден астам.
Айыпталушы кінәсін толық мойындап, шығынды мемлекетке толық өтеген. Алайда сот оны Қылмыстық кодекстің 189-бабының 3-бөлімі (сеніп тапсырылған бөтен мүлікті иемдену немесе ысырап ету) бойынша кінәлі деп таныды.
Сот үкімі бойынша 2 жылға бас бостандығынан айырылып, мемлекеттік және квазимемлекеттік органдарда қызмет атқару құқығынан өмір бойына айырылды. Айыпталушы сот залында қамауға алынды.
Жәбірленуші тарап ретінде Шымкент қалалық білім басқармасы танылды. Үкім заңды күшіне енді.