RUS
SMARTNEWS.KZ басылымының хабарлауынша, Алматы қалалық соты ерлі-зайыптыға қарулы шабуыл жасаған 38 жастағы ер адамға қатысты үкім шығарды. Ол 16 жылға қатаң режимдегі колонияға сотталды. Бұл туралы қалалық соттың баспасөз қызметі хабарлады.
Қылмыс 2024 жылдың соңында болған. Сот материалдарына сәйкес, сотталушы өзін электр жөндеуші ретінде таныстырып, элиталық тұрғын үй кешеніндегі пәтерге заңсыз кірген. Ол алдын ала бет-жүзін медициналық маска мен шарфпен жасырып, тұрғындарға сенім ұялату үшін электрші кейпінде әрекет еткен.
Тергеу деректеріне сүйенсек, күдікті шабуыл жасалған пәтерде бұған дейін жиһаз орнату жұмыстарымен жүрген. Сол кезде пәтер ішіндегі сейфті байқап, ұрлық жасауды алдын ала жоспарлаған.
Оқиға күні ол пәтердің есігін қаққанда, үй иесі әйел есікті ашқан. Сол сәтте шабуылдаушы оған бағыттап жауынгерлік тапаншамен бірнеше рет оқ атқан. Айқай естіген ері көмекке жүгіріп шыққанда, оған да оқ жаудырған. Жараланған ерлі-зайыпты дереу ауруханаға жеткізілген. Медициналық көмек арқасында олардың өміріне қауіп төнбеді.
Күдікті оқиға орнынан бой тасалағанымен, көп ұзамай ұсталып, қамауға алынды.
Сот қаскөйдің әрекетін аса қауіпті рецидив және адамдардың өміріне тікелей қауіп төндіру ретінде бағалады. Оған ҚР ҚК-нің «Қарақшылық», «Адам өлтіруге оқталу» және «Заңсыз қару сақтау» баптары бойынша айып тағылды.
Сот үкіміне сәйкес, ер адам 16 жыл мерзімге бас бостандығынан айырылып, жазасын қатаң режимдегі түзету колониясында өтейтін болады. Үкім заңды күшіне енді.