RUS
SMARTNEWS.KZ басылымының хабарлауынша, танымал әнші Сәкен Майғазиевтің ұлы Әділет сүйіктісімен қалай танысқаны туралы айтып берді. Оның айтуынша, болашақ жары – Маңғыстау өңірінің тумасы, жақын досының қарындасы болып шыққан.
«Бір жыл бұрын Ақтауда таныстық. Берекет деген досым кофехана ашқан еді. Әкем, көмекшісі және мен үшеуіміз сол жерге қолдау көрсетуге бардық. Сол кезде Әдияны сырттай көріп, бірден ұнатып қалдым. Бірақ ашылу салтанатында танысуға мүмкіндік болмады», – дейді Әділет.
Кейін Берекет досының үйлену тойында қайта жолыққан. Бұл жолы жандарында отбасылары да болған. Жастар кешкі басқосуда жақынырақ танысып, араласа бастаған. Тойдан кейінгі бір сәтте Әділет болашақ жарына қамқорлық танытып, аяқ киімін алып бергенін еске алады.
«Сол сәттен бастап бір-бірімізді тани бастадық. Уақыт өте келе достығымыз махаббатқа ұласты. Енді міне, шаңырақ көтердік», – деді ол.
Ал Әдия Мәулен – Жаңаөзен қаласының тумасы. Кейін Ақтауға көшіп, қазір Алматыда тұрып жатыр. Мамандығы – қонақүй бизнесі, колледж түлегі. Болашақта жоғары оқу орнына түсуді жоспарлап отыр.
«Әділетпен ресми түрде араласқанымызға тоғыз ай болды. Бір-бірімізді бұрыннан, 3–4 жылдан бері сырттай танимыз. Жасым – 20-да. Енемен тұру тақырыбында нақты позициям жоқ – бейтараппын. Үйде көп адаммен шай ішкенді жақсы көремін. Өзім де көпбалалы отбасында өскенмін», – дейді жас келін.