RUS
SMARTNEWS.KZ басылымының хабарлауынша, Қостанай облысында 2003 жылы жыныстық қатынасқа түспегені үшін әйелді тұншықтырып өлтірген ер адам 22 жылдан кейін 15 жылға бас бостандығынан айырылды. Бұл туралы Қостанай облыстық соты мәлімдеді.
Іс материалдарына сәйкес, 2003 жылдың 30 мамырында сотталушы мен жәбірленуші түнгі уақытта алкогольді ішімдік ішіп, кейін ер адам әйелді үйіне дейін шығарып салған. Жолда ол жыныстық қатынас ұсынған, алайда жәбірленуші бас тартқан. Ашуға булыққан ер адам оны қолымен тұншықтырып өлтіріп, оқиға орнынан қашып кеткен.
Іс тек 20 жылдан астам уақыт өткеннен кейін қайта көтерілді. Сот отырысы барысында сотталушы кінәсін мойындамады, өзіне ақтау үкімін шығаруды сұрады.
Алайда сот оны ҚР ҚК 96-бабы 1-бөлігі (1997 жылғы редакция) бойынша кінәлі деп таныды. Бұған дейін 2018 жылы басқа қылмыс үшін сотталғаны және жазасын өтегені де ескерілді.
«Қылмыстық құқық бұзушылықтар жиынтығы бойынша сот 15 жыл бас бостандығынан айыружазасын тағайындады. Жазаны өтеу орны — қауіпсіздігі жоғары мекеме», – делінген сот хабарламасында.
Үкім заңды күшіне енген жоқ.