RUS
SMARTNEWS.KZ басылымының хабарлауынша, «Отбасы банк» директорлар кеңесінің мүшесі Эльмира Ермекова телефон алаяқтарының құрбаны болды. Ол өзін Ұлттық банк пен ҰҚК қызметкерлеріміз деп таныстырған белгісіз адамдардың сөзіне сеніп, депозиттегі қаржысын қолма-қол ұстата салған. Бұл туралы Telegram-дағы Kozachkov offside арнасы жазды.
Журналист Михаил Козачковтың дерегінше, оқиға биыл көктемде болған. Ермекованың телефонына өзін банк төрайымы Ләззат Ибрагимова деп таныстырған адамнан хабарлама келіп, «ҰҚК тексеріс жүргізіп жатыр, сәлден соң орган өкілі хабарласады» деп ескерткен.
Көп ұзамай бейнеқоңырау арқылы елтаңба мен президент портреті ілулі тұрған кеңседен өзін ҰҚК өкіліміндеген ер адам шығып, қаржыңыз қауіпте, «сақтау үшін» бізге өткізіңіз дегенге сендірген. Кейін өзін Ұлттық банк қызметкері деп таныстырған тағы бір адам қосылып, қызметтік куәлігін де көрсеткен.
Осылайша, банкир ақшасы салынған пакетті «Баракуда» деген құпия сөзді айтқан жігітке тапсырып жібереді. Бұдан соң алаяқтар оның тағы бір банк депозитін шешіп алуға үгіттейді. Алайда банк қызметкерлері күдіктеніп, алаяқтардың ықпалында болуы мүмкін екенін айтып, тоқтатқан.
Эльмира Ермекова дереу полицияға жүгініп, күдіктіні ақша беру кезінде ұстауға көмектескен. Ұсталған – 21 жастағы Ахмад Мұхидинұлы. Кейін оның сыбайласы, 31 жастағы Дастан Бекботаев та қолға түсті. Оның үйінен «Sim-box» құрылғысы табылған — дәл осы құрылғы арқылы Ермековаға хабарласу ұйымдастырылған.
Алаяқтар арасындағы шетелдік ұйымдастырушылар табылған жоқ, олар Қазақстаннан тыс аумақта жүрген көрінеді.
Сот үкімі бойынша Мұхидинұлы мен Бекботаев алаяқтық жасады деп танылып, 5 жылға бас бостандығынан айырылды. Үкім әлі заңды күшіне енбеген.