RUS
SMARTNEWS.KZ басылымының хабарлауынша, жас әнші Самат Жанғазин танымал әнші Қайрат Нұртастың өзінің жаңа әнін рұқсатсыз орындап жүргенін мәлімдеді. Бұл туралы ол әлеуметтік желідегі парақшасында жазды.
Жанғазиннің айтуынша, "О махаббат, ғажапсың" атты әнді ол композитор Дәурен Шәріппен бірге жазған, ал аранжировкасын Азамат Сәбетов жасаған. Әншінің айтуынша, бұл шығарма үлкен еңбектің нәтижесінде дүниеге келген.
“Композитор Дәурен Шәріп ағамызбен былтырдан бері дайындадық. Күні-түні ұйықтамай студияда жаздық. Аранжировкасын Азамат Сәбетов есімді бауырымыз жасады. Осындай еңбекпен жарық көрген әнді сұрамай жаза салу деген қалай түсінесіздер?” – деп жазды ол.
Әлеуметтік желідегі жазбадан кейін Қайрат Нұртастың өкілі Саматпен байланысқан. Жанғазиннің сөзінше, олар кешірім сұраудың орнына, келісімшарт пен ақшалай өтемақы ұсынуға тырысқан. Алайда әнші мәселені сотқа жеткізбей, адамгершілікпен шешкісі келгенін айтады.
“Білмеймін, адамдарда адамгершілік болуы керек. Осындай әрекеттерімен атына кір келтірді. Енді Дәурен ағамызға хабарласып "Ақшасын берейік, басқасын берейік, келісімшарт жасайық" деген секілді хабарласып жатыр екен. Сонда мені аттап кетіп, осындай тірлік жасап жатыр. Білмеймін, легенда, легенда деген сайын... Легендаға сай болу керек қой. Легенда – үлкен мағына, үлкен ат. Мен сіздерді түсінбедім. Сіздер қалай ойлайсыздар? "О махаббат, ғажапсың" деген әнім осындай болып жатыр”, – деді ол Қайрат Нұртасқа қарата.
Қайрат Нұртас пен оның командасы бұл мәлімдемеге қатысты әзірге ресми жауап берген жоқ.