RUS
SMARTNEWS.KZ басылымының хабарлауынша, Еуропалық комиссия 2027 жылға дейін Ресейден мұнай мен газ импортына толықтай шектеу қоюды көздейтін жаңа заң жобасын жариялады. Бұл бастама REpowerEU бағдарламасының бір бөлігі болып табылады. Аталған жоспар атом энергетикасына қатысы жоқ — бұл сала бөлек қаралатын болады.
Қатаң мерзім мен нақты стратегиялар
Құжатта ресейлік газға жаңа келісімшарттар 2026 жылдың 1 қаңтарынан бастап тыйым салынады делінген. Қолданыстағы қысқа мерзімді келісімдер 2026 жылдың 17 маусымына дейін тоқтатылуы тиіс. Теңізге шыға алмайтын кейбір елдер үшін ұзақ мерзімді келісімдер 2027 жылдың соңына дейін жарамды болып қала береді.
Сондай-ақ Ресеймен байланысты компаниялардың ЕО аумағындағы сұйытылған табиғи газ (LNG) терминалдарында жұмыс істеуіне тыйым салынады. Бұл шешім балама жеткізушілерге жол ашу мақсатында қабылдануда.
Диверсификация жоспарлары міндеттеледі
Барлық ЕО елдері Ресей энергиясынан бас тарту жолдарын нақты көрсететін ұлттық жоспарлар ұсынуы тиіс болады.
Кей елдер қарсы шықты
Дүйсенбі күні өткен ЕО энергетика министрлерінің кездесуінде Венгрия мен Словакия бұл ұсынысқа қарсы пікір білдірді. Венгрия сыртқы істер министрі Петер Сийярто бұл қадам ұлттық энергетикалық қауіпсіздікке қауіп төндіреді деп мәлімдеді.
Дания – алға жылжуға мүдделі
1 шілдеден бастап ЕО Кеңесіне төрағалық ететін Дания үкіметі заң жобасын тезірек саяси мақұлдатуға ниетті. Елдің климат және энергетика министрі Ларс Аагаард бұл құжатты Жаңа жылға дейін бекіту — үлкен жетістік болатынын айтты.
Жоба алдымен Еуропарламент пен ЕО Кеңесінде қаралып, кейін трилог форматындағы келіссөздерге өтеді. Кеңесте заң қабылдануы үшін ЕО елдерінің кемінде 15 мемлекеті және халықтың 65%-ын қамтитын елдер қолдауы қажет. Ал Еуропарламентте жай көпшілік дауыспен бекітіледі.