RUS
SMARTNEWS.KZ басылымының хабарлауынша, желіде көше сыпырып жүрген әйелдерге дөрекілік көрсеткен блогерлердің видеосы таралып, қоғамда қызу талқы туғызды. Көпшілік бұл әрекетті «көңілді әзіл емес, қорлау» деп бағалап отыр.
Бейнежазбадан жүкті әйел мен ер адамның көше тазалап жүрген әйелдерге дауыс көтеріп, киімін «ластап тастадыңдар» деп айыптап, қоқыс лақтырған сәті көрінеді. Бір тазалықшы әйел блогерлердің сөздерінен кейін жылап жібереді. Оған әріптесі араша түсіп, былай дейді:
«Сендердің аналарың жоқ па өзі?»
Алайда ер адам керісінше, «біз ақша төлейміз, сондықтан осындай істерге шыдасын» деп, тіпті тағы да қоқыс лақтырған. Видео соңында бір жас қыз келіп, бұл «әзіл» екенін айтып, көше тазалаушыларға 5000 теңгеден «сыйлық» береді.
Видео TikTok және Instagram желілерінде 900 мыңнан астам қаралым жинады. Алайда көпшілік ондағы әрекетті айыптап, пікірлерде ашық сын айтып жатыр.
Әлеуметтік желі қолданушылары видео авторларын қоғам алдында кешірім сұрауға және заң алдында жауап беруге шақырды:
«Бұл пранк емес, нағыз моральдық қысым!», «Жылаған адамнан кейін 5 мың теңге ұстатып, бәрі жақсы дегені — ең сорақы әрекет қой!», «Хайп үшін кісі өлтіруге дейін баруға дайын сияқты...» - дейді жұрт.
Қолданушылардың көбі бұл видеоны егде жастағы әйелдерді қорлау ретінде бағалап, блогерлерге заңды шара қолдануды талап етуде.