RUS
SMARTNEWS.KZ басылымының хабарлауынша, ҚР Ішкі істер министрі Ержан Саденов Шерзат Полаттың әкесі Қаржаубай Нұрымовқа қатысты ешқандай қылмыстық іс қозғалмағанын растады.
Бүгін Мәжілісте өткен жиында журналистер министрден Қаржаубай Нұрымовқа қатысты тергеу басталғаны жөніндегі қауесетке қатысты нақты жауап сұрады.
— Жалпы, бұл жөнінде ресми сауал жіберіңіздер. Бірақ бірден айтайын: Қаржаубайға қатысты қазір қылмыстық іс жоқ, — деді Ержан Саденов.
Еске салайық, бұған дейін Бас прокурордың орынбасары Әсет Шындалиев те Шерзат Полат ісіне қатысты сот процесі жайлы пікір білдірген болатын.
3 маусымда соттағы жарыссөз кезеңінде айыпталушы Нұрбол Тоқтаубаев өз сөзінде Шерзаттың өліміне Қаржаубай Нұрымовты күдікті деп тануды сұраған. Алайда 5 маусым күні Жетісу облысының мамандандырылған ауданаралық соты бұл іс бойынша үкім шығарды.
Қоғамда үлкен резонанс тудырған бұл істің аясында Қаржаубай Нұрымовтың аты жиі аталып жүргенімен, қазіргі таңда оған қатысты тергеу жүріп жатпағаны ресми түрде нақтыланды.