RUS
SMARTNEWS.KZ басылымының хабарлауынша, Қостанай облысы Қамысты ауданының тұрғыны мысық тістеп алғаннан кейін, құтырма белгілерімен Лисаков қалалық ауруханасына жеткізіліп, кейін көз жұмды. Бұл туралы облыстық санитарлық-эпидемиологиялық бақылау департаменті мәлімдеді.
Қайғылы оқиға 2025 жылдың мамыр айында болған. Марқұмды өз үйіндегі мысық тістеген. Эпидемиологиялық тергеу барысында жануардың кейін жоғалып кеткені анықталды. Дәрігерлердің айтуынша, зардап шеккен әйел алғашқы кезде медициналық көмекке жүгінбеген және алдын алу екпесін алмаған. Тек аурудың клиникалық белгілері біліне бастағанда ғана ауруханаға барған. Алайда тым кеш болған.
Облыста 2020 жылдан бері алғаш рет адам өлімімен аяқталған құтырма дерегі тіркеліп отыр.
Санитарлық қызмет өкілдері жануарлар тістеп немесе тырнап алған жағдайда, дереу медициналық көмекке жүгініп, профилактикалық вакцина салдыруды ескертеді. Құтырма — аса қауіпті жұқпалы ауру, дер кезінде емделмесе, өліммен аяқталуы мүмкін.