RUS
SMARTNEWS.KZ басылымының хабарлауынша, Мәжіліс депутаты Дәулет Тұрлыхановтың ұлы Нұрасыл Болат жазасын айыппұлмен ауыстыру туралы берген өтінішін кері қайтарып алды. Бұл туралы істің жәбірленушілерінің бірі саналатын заңгер Анна Чернова әлеуметтік желідегі парақшасында хабарлады.
Сот отырысы 19 маусымда өткен. Онда Нұрасыл Болаттың жазасын өзгерту мәселесі қаралған. Алайда сотталушы бұл өтінішінен өз еркімен бас тартқан.
Еске салайық, 2024 жылдың ақпан айында Анна Чернова мен оның күйеуі қыз балаға күш көрсетіп жатқан жігітті тоқтатпақ болғанда өздері соққыға жығылғанын мәлімдеген. Тергеу барысында бұл іске күдікті ретінде Дәулет Тұрлыхановтың ұлы Нұрасыл Болат танылған. Іс Қылмыстық кодекстің 293-бабы ("Бұзақылық") бойынша қозғалған.
Кейін күдіктінің әскери қызметкер екені белгілі болып, материалдар Алматы қалалық прокуратурасына берілген.
Депутат Тұрлыханов бұл оқиғаға байланысты:
“Ұлымның кінәсі дәлелденсе, заң аясында жауап береді”, – деп мәлімдеген болатын.
Ал Бас әскери прокурордың бірінші орынбасары Мақсат Қазиев істің заң бойынша қаралатынын және шешімді тек сот қабылдайтынын айтқан.