Белгілі блогер өгей қызын айлар бойы зорлаған

2025 жылдың маусым айында Өзбекстан астанасы Ташкенттегі Сергелі аудандық соты өгей қызын бірнеше ай бойы зорлап келген жергілікті блогерге қатысты сот үкімін шығарды. Ер адам 16 жыл 6 айға бас бостандығынан айырылды.

Сот процесі жабық режимде өтті, себебі қылмыстық іс кәмелетке толмаған жәбірленушіге қатысты қаралды.

Тергеу мәліметінше, ер адам 11 жастағы өгей қызына бірнеше ай бойы зорлық көрсетіп келген. Қылмыстық әрекет тек баланың анасы құқық қорғау органдарына жүгінгеннен кейін анықталған.

Сот ер адамды Өзбекстан Қылмыстық кодексінің бірнеше бабы бойынша — сексуалдық сипаттағы зорлық, алаяқтық және денсаулыққа қасақана зиян келтіру бойынша кінәлі деп тапты. Бұған дейін оған өліммен қорқыту бабы бойынша да айып тағылған болатын. Алайда апелляциялық шағым нәтижесінде бұл айып алып тасталды.

Сот үкіміне сәйкес, сотталушы жәбірленушіге моральдық зиян ретінде 254 миллион сум (шамамен 10 млн теңге) өтемақы төлеуі тиіс.

Айта кетейік, бұл жағдай туралы алғаш рет 2024 жылдың маусымында белгілі болды. Тергеу барысында ер адамның тағы бес баласы бары анықталған.