RUS
SMARTNEWS.KZ басылымының хабарлауынша, Ресейдің Білім министрлігі мектеп бағдарламасына өзгерістер енгізіп, украин тілін оқыту тізімінен алып тастады. Бұл туралы ведомствоның 200 беттен тұратын ресми бұйрығында айтылған. Құжатқа алғаш болып «Коммерсант» басылымы назар аударған.
Министрлік бұл шешімді «әлемдегі геосаяси жағдайдың өзгеруімен» түсіндірген.
Енді украин тілі Ресей Федерациясындағы ұлттық республикаларда ана тілі ретінде оқытылатын пәндер қатарынан толықтай алынып тасталады. Өзгеріс мектеп бағдарламасының барлық деңгейіне – бастауыш, негізгі және орта білімге қатысты.
Министрліктің мәліметінше, 2023–2024 оқу жылында украин тілі тек Ресей жаулап алған Запорожье мен Херсон облыстарында міндетті пән ретінде оқытылған. Ал Қырым, Донецк, Луганск және Башқұртстанда ата-аналардың өтініші бойынша ғана оқытылып келді.
Сонымен қатар, жаңа бұйрықта агротехнологиялық бағыттағы сыныптар ашу туралы тармақ та бар. Бұл сыныптар орта мектеп деңгейінде іске қосылмақ.