RUS
SMARTNEWS.KZ басылымының хабарлауынша, Өзбекстандағы Ферғана облысында жол инспекторы көлікте мойны әйнеккөтергішке қысылып қалған баланы құтқарып қалды.
Өзбекстанның Ферғана облысында жол-патруль қызметкері көліктің ішінде қалып қойған баланы өлімнен арашалап қалды. Бұл туралы Жол қозғалысы қауіпсіздігі қызметі мәлімдеді.
Оқиға видеосынан көлікте бала жалғыз қалғаны байқалады. Ол терезеге басын шығарып тұрған кезде автоматты әйнеккөтергіш қосылып, мойнын қысып қалған.
Абырой болғанда, жақын маңда жүрген инспектор жағдайды дер кезінде байқап, бірден әрекет етті — ол көліктің терезесін сындырып, баланы құтқарып үлгерді.
Құқық қорғау органдары жүргізушілерге балаларды көлікте қараусыз қалдырмауға шақырды.