RUS
SMARTNEWS.KZ басылымының хабарлауынша, Маңғыстау облысының тұрғыны Шалғын Өтеғұловқа 60 жылдық мерейтойында тосынсый жасалды. Әкелер күнімен тұспа-тұс келген қуанышты күнде оның 10 қызы бірлесіп пәтер сыйлап, елдің ықыласына бөленді. Бұл туралы үйдің үлкен қызы Жақсыгүл Шалғынғызы Stan.kz тілшісіне айтып берді.
Жақсыгүл Шалғынқызы ата-анасына үй алып беру идеясын 1 жыл бұрын қолға алғандарын айтады.
«2021 жылы әкемізге көлік сыйлағанбыз. Бұл жолы мерейтойды ұмытылмас сәтке айналдыру үшін барлығымыз шама-шарқымызша қаражат жинадық. Үй іздеуге егіз сіңлілеріміз Әмина мен Әлина атсалысты. Ал үйді сәуір айында сатып алып, кілтін 14 маусым күні салтанатты түрде табыстадық», – дейді Жақсыгүл.
Үйді Ақтаудан алған. Бұған дейін ата-анасына бір бөлмелі пәтер тарту етіп, оны қыздардың өздері пайдаланып жүрген. Енді жаңа баспана – зейнетке жақындаған ата-ананың қаладағы жайлы мекені болмақ.
«Ата-анамыз бұл тосынсыйды күтпеді. Анамыз қуаныштан көзіне жас алып, «бөтен үйде отырғандаймын» деп қалды. Жасымыз келген сайын оларды қуанту – перзенттік парызымыз деп білеміз», – дейді ол.
Мерейтой күні мейрамханадан кейін туған-туыстардың барлығы жаңа пәтерге барып, арнайы дастархан басында қуанышты бөліскен. Жақсыгүлдің айтуынша, 700 мың теңгеден бастап жиналған қаржының көбі пәтерге жұмсалған. Сонымен қатар анасына алтын білезік те тарту етілген.
Шалғын Өтеғұлов – бұрын Қаламқас кен орнында еңбек еткен, бүгінде ауыл мектебінде күзетші. Зайыбы Толқын мектепте вахта қызметкері. Балаларын еңбекпен өсіріп, білім мен тәрбие берген.
Жақсыгүл – мұғалім. Барлық қыздардың басым бөлігі білім саласында еңбек етеді, біреуі – ауылдық мәдениет үйінің директоры.
«Біз Қызан ауылында тұрамыз. Жанымызда ата-анамыздың барына шүкір. Ер азаматтарымыз да бұл бастамамызға қолдау білдіріп, демеу болды. Бірлік болса, алынбайтын асу жоқ екенін түсіндік», – дейді Жақсыгүл.
Жақсыгүлдің жасы – 37-де, кенжелері – 16 жастағы Сүйеніш. Он қыз бен бір ұлдан құралған бұл әулет көпшілікке өзара ауызбіршілік пен ата-анаға деген құрметтің жарқын үлгісін көрсетті.