RUS
SMARTNEWS.KZ басылымының хабарлауынша, бұрынғы Мәжіліс депутаты, қазіргі Шымкент қаласы әкімінің орынбасары Руслан Берденов «Respublica» партиясындағы тең төрағалық қызметінен кетуінің себептерін өзі түсіндірді.
«Бұл шешімді толық ойланып, саналы түрде қабылдадым», – дейді ол.
Берденов бұл шешімге бірнеше объективті себеп түрткі болғанын айтты:
Біріншіден, қазіргі лауазымы – мемлекеттік қызметкер. Ал Қазақстан заңнамасына сәйкес, мұндай қызметті атқаратын тұлғалар саяси партияда басшылық қызметте бола алмайды. Берденов заңға бағынып, талапты сақтауды жөн санағанын мәлімдеді.
Екіншіден, Respublica партиясының ішкі тәртібі де мемлекеттік қызмет пен партиялық лауазымды қатар алып жүруге тыйым салады.
«Біз саяси ықпал мен мемлекеттік басқару бөлінуі тиіс деп санаймыз», – деді ол.
Үшіншіден, денсаулық жағдайы да шешімге әсер еткен.
«Мемлекеттік қызметтегі жұмысымды жауапкершілікпен атқару үшін денсаулығыма басымдық беріп отырмын», – деді Берденов.
Ол Respublica партиясының бастапқы идеяларына адал болып қала беретінін және командаластарына алғыс айтып, табыс тіледі.
Еске сала кетейік, биыл 24 ақпанда Руслан Берденов Шымкент қаласы әкімінің орынбасары болып тағайындалды. Осыған байланысты оның Мәжіліс депутаттығы тоқтатылды.
Сәуір айында Берденовке қастандық жасалып, ол ауыр халде ауруханаға түскен. Жедел ота жасалып, кейін сауығып шыққан болатын.