RUS
SMARTNEWS.KZ басылымының хабарлауынша, АҚШ Жоғарғы соты президент Дональд Трамптың мигранттарға қатысты жарлығын қолдап, федералды соттардың бұл жарлықты nationwide (жалпыұлттық деңгейде) тоқтата тұру құқығын шектеді. Бұл шешім мигранттардан туған балаларға автоматты түрде АҚШ азаматтығын беруді тоқтату туралы Трамптың жарлығына байланысты қабылданды.
Трамп бұл жарлыққа Ақ үйге қайта оралған соң қол қойған. Бұған дейін кейбір соттар бұл жарлықтың күшіне енуіне жол бермей келген еді. Алайда Жоғарғы сот федералды судьялардың мұндай әрекеттерге әрдайым құқығы жоқ екенін мәлімдеді.
Шешім бір ауыздан шыққан жоқ: 6 судья «иә» деп дауыс берсе, 3-еуі «жоқ» деп қарсы болды. Енді төменгі соттар өз шешімдерін қайта қарауы тиіс. Бірақ жарлықтың өзі заңды ма, жоқ па – ол бөлек сұрақ, оған Жоғарғы сот әзірге баға берген жоқ.
Дональд Трамп бұл шешімді «үлкен жеңіс» деп атап, Конституция «радикал көзқарастағы судьялардың араласуынан» қорғалды деді. Ол бұл шешім үшін өзі ұсынған Жоғарғы сот судьясы Эми Кони Барретке алғыс айтты.
«Бұдан былай жергілікті судьялар бүкіл ел бойынша президент жарлықтарының күшін жоя алмайды. Олар тек өз округі аясында ғана тоқтата алады. Бұл президент әкімшілігінің ішкі саясаттағы ықпалын күшейтеді», – делінген жарияланған мақалада.
Соңғы күндері Жоғарғы сот тағы бір шешім қабылдап, құжатсыз жүрген, бірақ еліне қайтарылмайтын мигранттарды үшінші елдерге депортациялауды қолдады. АҚШ Ішкі қауіпсіздік министрлігі бұл шешімді «қауіпсіздік үшін жеңіс» деп бағалап, енді депортациялық рейстерді еш кедергісіз бастауға болады деді.
Бұл шешімдер Трамп әкімшілігінің миграциялық саясаттағы қатаң бағытын заңмен бекітіп, алдағы айларда ішкі саяси атмосфераға айтарлықтай ықпал етуі мүмкін.