RUS
SMARTNEWS.KZ басылымының хабарлауынша, қазақ эстрадасының жұлдызы, жуырда үшінші рет ана атанған Ерке Есмахан үшін отбасында маңызды сәт орын алды — әншінің тұңғышы, 13 жастағы Муслим бір айға АҚШ-қа сапарға шықты. Бұл туралы Ерке Instagram желісіндегі стористерінде бөлісті.
Алдымен ол үйдегі қоштасу сәтінен кадрлар жариялады. Ортаншы ұлы, рэпер Raim екеуінің ортақ баласы Ислам ағасын қимай, көз жасына ерік берген. Тіпті кішкентай бала Муслимнің чемоданына отырып алып, оны жібергісі келмей жылаған сәті де жұрттың жүрегін елжіретті.
Артынша әнші ұлын әуежайға шығарып салған сәттен де видео көрсетті. Кадрдан Муслимнің өзімен қатар басқа жасөспірімдермен бірге кедендік тексеруден өтіп жатқанын көруге болады. Жақындарымен қоштасып бара жатқан ұлына Ерке: «Бақытты бол, өзіңді күт» деп қысқа әрі жүрекжарды тілек жазды.
Желі қолданушылары бұл сәтке бейжай қарамай, жасөспірімге ақ жол тілеп, жылы лебіздерін білдіріп жатыр. Көпшілік Муслимге сәтті сапар мен ұмытылмас әсер тілеген.
