RUS
SMARTNEWS.KZ басылымының хабарлауынша, Ақтөбеде жастар арасындағы қақтығыстан кейін бір адам қаза тауып, он адам түрлі мерзімге бас бостандығынан айырылды.
Қанды оқиға 2024 жылдың 27 мамырында қаладағы автотұрақтардың бірінде болған. Жасөспірімдер арасында туындаған жанжал қарулы шабуылға ұласып, 18 жастағы Диас Талғатұлы жүрек тұсынан пышақталып, көз жұмды. Тағы сегіз адам әртүрлі жарақат алды.
Іс материалдарына сәйкес, жанжал бір оқушының ағасына біреудің себепсіз қол көтеруімен басталған. Екі тарап кейінірек кездесуге уағдаласып, ақша мен қымбат ұялы телефон талап еткен. Талап орындалмаған соң күдіктілер қару мен пышақ қолданып, қарсы топқа шабуыл жасаған.
Сотта 77 томнан тұратын іс үш қылмыстық баппен қаралды. 10 айыпталушының жасы – 21-25 аралығында. Барлығы кінәсін мойындамаған. Жәбірленуші тарап оларға 50 миллион теңгеден астам материалдық және моральдық шығынды өтеу туралы талап қойған. Сот азаматтық талапты ішінара қанағаттандырды.
Сот шешімімен айыпталушыларға мынадай жаза тағайындалды:
Арсен Нысаналиев – 20 жыл
Мұхаммад-әли Дилшодбекұлы – 20 жыл
Досымжан Құсманов – 22 жыл
Ильяс Саловатов – 15 жыл 6 ай
Жанболат Марқабаев – 11 жыл 6 ай
Нұрзат Бақтыбаев – 15 жыл 6 ай
Руслан Сағынбаев – 15 жыл 6 ай
Тимур Есхожин – 15 жыл 6 ай
Сұлтан Типаев – 15 жыл 6 ай
Әділет Сағынов – 15 жыл 6 ай
Сотталушылардың қорғаушылары үкіммен келіспейтінін айтып, апелляциялық шағым түсіретінін мәлімдеді. Істі Ақтөбе облысының қылмыстық істер жөніндегі мамандандырылған соты судья Жәнібек Сейтжаппаров қарады.