RUS
SMARTNEWS.KZ басылымының хабарлауынша, Алматы облысы, Жалпақсай ауылында 10 жасар бала иттердің шабуылына ұшырап, ауыр жарақатпен ауруханаға түсті. Куәгерлердің айтуынша, үш төбет футбол алаңында ойнап жүрген балаларға тап берген. Қалған балалар қашып құтылса, Михаил есімді бала иттерден жапа шеккен.
Баланы ауыл тұрғыны ажал аузынан құтқарды
Оқиға кезінде жолдан өтіп бара жатқан Серік Сақабеков есімді тұрғын иттерге араша түсіп, бәкімен оларды қуып таратқан. Оның айтуынша, овчарка баланы иығынан сүйреп бара жатқан.
«Қанға тұншығып жатыр екен. Пышақпен иттерге соққы беруге мәжбүр болдым. Баланы аман алып қалдым. Артынан анасы жүгіріп келді», — дейді ол.
Ит иелері керісінше — құтқарушыдан өтемақы сұраған
Куәгердің сөзінше, келесі күні иттің иесі хабарласып, өлген иттер үшін өтемақы талап еткен:
«Екі иттің ақшасын төлейсің, олар — қымбат иттер» деді. Сонда мен қарап тұруым керек пе еді, бала өліп жатса да?!» — деп ашынды Серік Сақабеков.
Иттер оңалту орталығына тиесілі, мекеме баланы кінәлап отыр
Иттердің жекеменшік оңалту орталығына тиесілі екені анықталды. Бұл нысан бұрынғы мәдениет үйі болған, қазір онда түрлі тәуелділіктерден емдеу жүргізіледі. Ауыл тұрғындары бұл жерді "секта" деп атайды — ішінде түсініксіз дыбыстар шығып, ауласы итке толы дейді.
Мекеме өкілдері кінәні мойындамай отыр:
«Бала біздің аумаққа рұқсатсыз кірді. Видеосы бар. Иттер өзімізге керек. Екі ит өлтірілді», — деді олар.
Алайда Михаил футбол алаңында болған. Иттердің ол жерге бұзылған қоршау арқылы кіріп кеткеніхабарланды.
Әкімдік пен полиция тексеру бастады
Ұмтыл ауылдық округінің әкімі Ислам Ибатжан оқиғадан кейін мекемеге қатысты тексеріс жүргізілетінін айтты:
«Ит ұстау талаптары заңға сай ма, жұмыс тәртібі қандай – барлығы тексеріледі», — деді әкім.
Полиция қылмыстық іс қозғады, тергеу басталды. Зардап шеккен Михаил Қаскелең қаласындағы ауруханада, бірнеше күрделі операция күтіп тұр.
Ауыл тұрғындары оқиғадан соң бұралқы ит мәселесін көтеріп, тиісті мекемелер иттерді ауласын талап етуде.