RUS
SMARTNEWS.KZ басылымының хабарлауынша, Қазақстан Ішкі істер министрлігі заңсыз көші-қон арналарына қарсы күресті күшейтіп жатыр. Ведомство өкілдерінің мәліметінше, елордада шетелдік азаматтарға жалған құжат жасап, заңсыз тіркеумен айналысқан бірнеше тұлға анықталды.
— Күдіктілердің бірі халыққа қызмет көрсету орталығы арқылы жалған құжаттарды пайдаланып, жақын шет елдерден келген ондаған азаматқа уақытша тұру рұқсаттарын заңсыз рәсімдеген, — деді Криминалдық полиция департаментінің бастығы Қанат Нұрмағамбетов.
Тінту кезінде медициналық анықтамалар, мөрлер, электронды тасымалдағыштар және өзге де құжаттар тәркіленген.
Оқу орнында ұйымдасқан қылмыстық схема анықталды
ІІМ ақпаратына сүйенсек, Астанадағы жоғары оқу орындарының бірінде де ұқсас заңсыз әрекет тіркелген. Оқу орнының екі қызметкері алыс шетелден келген 68-ден астам азаматқа жалған шақыру жасап, оларды студент ретінде тіркеген.
— Олар кәсіпкермен жалған келісімшарт жасап, оқу процесін қолдан ұйымдастырған. Осы жалған құжаттар арқылы шетел азаматтары Қазақстанға кіріп, рұқсатсыз еңбек қызметімен айналысқан, — деді Нұрмағамбетов.
Тергеу жүріп жатыр
Аталған фактілер бойынша ҚР Қылмыстық кодексінің «Заңсыз көші-қонды ұйымдастыру» бабымен сотқа дейінгі тергеу басталды. Министрлік мәліметінше, 2025 жылдың басынан бері осындай сегіз заңсыз көші-қон арнасы анықталып, жойылған.