RUS
SMARTNEWS.KZ басылымының хабарлауынша, желіде Алматы облысында иттердің балаға шабуыл жасаған жерінен видео тарады. Кадрлар Instagram-дағы Inucobo жануарларды қорғау қауымдастығының парақшасында жарияланды. Бейнежазбаны қауымдастыққа иттердің иесі – кинолог Алмас Хамеев жариялаған.
Қауымдастықтың мәліметінше, Максим есімді бала досымен бірге адам тәуелділігінен емдейтін оңалту орталығының маңындағы қоршаудың жанында ұзақ ойнаған. Бұл орталықта алкоголь мен есірткіге тәуелді адамдар ем қабылдайды. Сол аумақта кинолог Алмас Хамеев өз иттерін вольерде ұстап келген.
Видео сипаттамасында:
«Бұл күні аулада американдық булли тұқымдас жас иттер бос жүрген. Балалардың мұндай жердің жанында не істеп жүргені белгісіз. Ата-аналары ондай орталықтардан алшақ жүру керектігін үйретпей ме? Видео кадрларынан орталықтың тұрғын үйлерден қашықта орналасқаны байқалады. Иттер балаларға қарай үріп тұрғаны көрінеді», – делінген.
Кинолог Алмас Хамеевтің айтуынша, бейнебақылау камерасы көрші ғимаратта орнатылған. Бірақ иттердің балаға нақты шабуыл жасаған сәті жазбада жоқ. Дегенмен, видеодан баланың айқайы мен иттердің үргені анық естіледі.
Хамеев шабуыл стадионда емес, оңалту орталығының жеке аумағында болғанын айтады. Оның сөзінше, баланы сол жерге досы итеріп жіберген.
«Камера шабуыл болған аумақты түсірмейді. Егер бәрі стадионда болғанда, камераға айқай-шу жетпес еді. Ал бұл жазбада бәрі анық естіледі», – дейді кинолог.
Бұған дейін Хамеев оқиғаның өз нұсқасын айтып, балалар иттерді өздері арандатып, шу шығарғанын жеткізген. Ол иттер – ересек емес, 5-8 айлық күшіктер болғанын айтады: бірі – бельгиялық овчарка, екіншісі – американдық булли.
«Балалар қоршауға шығып, біреуі досын итеріп жіберді. Иттер ауладан сыртқа шыға алмайды», – деп сендірді Алмас Хамеев.
Орталық есірткі мен алкогольге тәуелді жандарды емдеумен айналысады. Кинолог Алмас Хамеев зардап шеккен балаға көмек ретінде дәрі-дәрмек пен ем-доммен қамтамасыз етуге дайын екенін, бірақ одан артық жауапкершілік алмайтынын мәлімдеді.