RUS
SMARTNEWS.KZ басылымының хабарлауынша, Атырауда небәрі екі күннің ішінде екі оқушы суицид жасады. Екеуі де бір мектептің оқушылары болғаны белгілі болды. Қайғылы жағдайлар қала жұртшылығын дүр сілкіндірді.
Мектеп директоры Айғаным Махметованың айтуынша, көз жұмған оқушылардың бірі — жуырда ғана 9-сыныпты тәмамдап, аттестат алған ұл бала. Алда оқуды жалғастыруды жоспарлаған.
— Ол өте ашық, мейірімді бала еді. Көпбалалы отбасындағы үшінші бала. Ата-анасына жақын жүретін, үлкендерді құрметтейтін, достарының ортасында көңілді жүретін. Әрқашан күліп жүретін, мектепте тәртіп бұзған емес, — дейді директор.
Екінші марқұм — 10-сыныпта оқыған қыз бала. Ол да тек жақсы қырынан танылған.
— Ол үздік оқушы болатын. Қоғамдық жұмыстарға белсенді қатысатын. Көпбалалы отбасынан шыққан. Жауапкершілігі жоғары, мақсатшыл, тәрбиелі, мейірімді еді. Қазірге дейін не себеп болғанын түсіне алмай отырмыз. Бұл — бүкіл мектеп үшін орны толмас ауыр қайғы. Біз өте жақсы балалардан айырылдық, — деді Айғаным Махметова көзіне жас алып.
Қайтыс болған оқушылар жазғы демалыста болған. Мұғалімдердің айтуынша, оқу жылы барысында мектепте жасөспірімдер арасындағы суицидтің алдын алу мақсатында түрлі шаралар өткізілген: психологтармен кездесулер, ата-аналар жиналысы, арнайы тәрбие сағаттары ұйымдастырылып отырған.
Қазіргі таңда аталған оқиғалар бойынша тергеу жүргізіліп жатыр.