RUS
SMARTNEWS.KZ басылымының хабарлауынша, Шығыс Қазақстан облысының Риддер қаласында жерге темекі тұқылын тастаған азамат әкімшілік жауапкершілікке тартылып, айыппұл салынды.
Алайда ер адам бұл шешіммен келіспей, полицияға қарсы сотқа шағым түсірді, алайда сот оны қанағаттандырған жоқ. Бұл туралы қалалық соттың баспасөз қызметі хабарлады.
Оқиға Третий шағынауданындағы дүкен маңында болған. Ер адам жерге темекі қалдығын тастағаны үшін ҚР ӘҚБтК-нің 434-бабының 2-бөлігі ("Қоғамдық орындарды қайта ластау") бойынша әкімшілік хаттама толтырылған.
Азамат өз кінәсін мойындамай, темекі тұқылын қоқыс жәшігіне тастағанын айтқан. Алайда сотта ұсынылған бейнематериалдар, фотосуреттер және куәгердің сөзі оның кінәсін дәлелдеді.
Сондай-ақ сот оның бұған дейін де дәл осы баппен жауапқа тартылғанын ескерген.
Нәтижесінде шағым қанағаттандырылмады, азаматқа 78 640 теңге көлемінде айыппұл төлеу міндеттелді.