RUS
SMARTNEWS.KZ басылымының хабарлауынша, Өзбекстанның Самарқанд облысындағы Каттакурган ауданында 32 жастағы әйел отбасылық жанжал кезінде күйеуінің көзіне тас лақтырып, оның денсаулығына ауыр зиян келтіргені үшін 4 жылға бас бостандығынан айырылды. Бұл туралы Podrobno.uz басылымы хабарлады.
Оқиға биыл 11 қаңтарда Чарогон елдімекенінде болған. Әйел бұрын бірге тұрған күйеуінің үйіне өз заттарын алу үшін келген. Сол кезде екеуінің арасында жанжал шығып, ашу үстінде әйел күйеуінің бетіне тас лақтырып жібереді. Тас оның сол көзіне тиіп, ауыр жарақат келтірген. Ер адамның көру қабілеті күрт нашарлап, жалпы еңбекке жарамдылығы 35%-ға төмендеген.
Сот процесі 3 шілдеде өтті. Әйел өз кінәсін толық мойындап, күйеуінің ішімдікке салынғанын, жиі жанжал шығаратынын, бірақ үш баласы үшін ажырасқысы келмегенін айтты.
Ал зардап шеккен ер адам бұрынғы әйелін опасыздық жасады деп айыптап, оның үйден өз бетінше кетіп қалғанын мәлімдеді. Сонымен бірге, бірнеше рет ажырасуға арыз бергенімен, әйел қарсы болғанын айтып, кешірім сұрамағанын және соттан заң шеңберінде шара қолдануды өтінді.
Сот әйелді отбасылық зорлық-зомбылық бабымен кінәлі деп танып, 4 жылға соттады. Тергеу кезінде үйқамақта отырған уақыты (9 сәуір – 3 шілде) ескеріліп, жазасының нақты мерзімі 3 жыл 9 ай 4 күн болып бекітілді. Ол жазасын колонияда өтейді.