RUS
SMARTNEWS.KZ басылымының хабарлауынша, Америка Құрама Штаттары Қытай компанияларына ауылшаруашылық жерлерін сатуға заңмен тыйым салуға кірісті. Бұл шешім ұлттық қауіпсіздік мәселесімен байланысты. Бұл туралы aikyn.kz жазды.
Қытайлық инвесторлар АҚШ-та шамамен 112 259 гектар жерге иелік етеді. Бұл – шетелдіктердің меншігіндегі барлық ауылшаруашылық жердің 1%-ы ғана. Алайда олардың кейбірі әскери базаларға тым жақын орналасқан, ал бұл – Конгресте және қауіпсіздік органдарында алаңдаушылық туғызуда.
АҚШ Ауыл шаруашылығы министрі Брук Роллинз бұл мәселені тікелей ел қауіпсіздігімен байланыстырды:
«Ауыл шаруашылығы – тек азық-түлік емес. Бұл – елді қорғау жолы», – деді ол.
Қытайға қарсы қатаң шаралар
8 шілдеде Роллинз ханым Қытай және басқа «қарсылас» елдердің азаматтарына АҚШ-тың ауылшаруашылық жерлерін сатып алуға тыйым салатын шұғыл заңдар қабылданатынын мәлімдеді. Сонымен қатар, бұған дейін сатып алынған жерлерді қайтарып алу да қарастырылуда.
АҚШ Қорғаныс министрі Пит Хегсет те бұл мәселеге назар аударып:
«Стратегиялық маңызы бар нысандар маңындағы жерлердің шетелдіктер қолында болуы – тікелей қауіп», – деді.
Қытай жауабы
Қытай елшілігі бұл шешімге наразылық білдірді. Елшілік өкілі Лю Пэнъюйдің айтуынша, мұндай әрекет инвестицияға деген сенімді бұзады және нарық ережелеріне қайшы.
«Ұлттық қауіпсіздік деген ұғымды шектен тыс кеңейту – халықаралық сауда қағидаттарына қарсы», – деді Лю.
АҚШ-та соңғы жылдары Қытай тарапынан тыңшылық әрекеттері туралы алаңдаушылық жиі айтылып жүр. Қытай жасаған технологиялар – әсіресе жел генераторлары мен коммуникациялық жүйелер – тыңшылық үшін қолданылуы мүмкін деген күдік бар.
АҚШ бұл бағытта одақтастарымен (Ұлыбритания, Канада, Аустралия және Жаңа Зеландия) бірлесіп әрекет етуде. Бұл елдер де Қытай инвестицияларына қатысты шектеулер енгізіп жатыр.