RUS
SMARTNEWS.KZ басылымының хабарлауынша, Қармақшы ауданындағы №121 мектептің бұрынғы қызметкері, сегіз баланың әкесі Нұрлан Ерғонтаев ауыр жарақаттан кейін мүгедек болып қалды. Алайда жұмыс орнында жарақат алған азамат әлі күнге дейін өтемақыға қол жеткізе алмай отыр, деп жеткізді Информбюро.
52 жастағы Нұрлан Ерғонтаев мектепте 19 жыл техникалық қызметкер болып істеген. Оның айтуынша, алғашқы жарақатты 7 жыл бұрын мектеп дәретханасын жөндеу кезінде алған – үстіне қабырға құлаған. Былтыр жылу қазандығында тағы бір ауыр жарақат алып, содан бері жұмысқа жарамсыз деп танылған.
– Күйеуім 8 баланы асырап отыр. Қазір балдақпен әрең жүреді. Денсаулығы нашар. Тиісті 40% өтемақыны сұрап отырмыз, – дейді жары Айнұр Тоқсанбаева. Ол да дәл сол мектепте еден жуушы болып жұмыс істейді.
Жергілікті еңбек инспекциясы қызметтік тексеру барысында мектеп әкімшілігінің тарапынан еңбек қауіпсіздігі талаптары бұзылғанын растаған. Яғни екі жағдайда да Нұрлан Ерғонтаев жарақатты жұмыс орнындағы немқұрайлылықтан алған.
Дегенмен, мектеп директоры Мұхтар Жұматаев бұл мәселеге қатысты әлі нақты шешім шықпағанын айтып отыр:
"40% өтемақы төленсін деген шешім жоқ. Құжаттар прокуратурада. Заңдылығын солар анықтайды", – дейді директор.
Қазір Ерғонтаевтар отбасы жалғыз табыс көзі – Айнұр Тоқсанбаеваның еңбекақысына қарап отыр. Ерлі-зайыптылар әділдік іздеп, енді сотқа жүгінуді көздеп отыр.