RUS
SMARTNEWS.KZ басылымының хабарлауынша, Қаржылық алаяқтықтың жаңа схемасы әшкере болды. Тергеу органдары жалған автокөлік арқылы несие алып, қарызды әлеуметтік әлсіз топтарға «ілген» қылмыстық топтың іс-әрекетін әшкереледі.
Генпрокуратура мәліметінше, күдіктілер жұмыссыз жүрген азаматтар мен мүгедектігі бар адамдарды арбай отырып, банкке жалған құжаттармен өтініш тапсырған. Осылайша, олардың атына жоқ көліктер үшін автонесиелер рәсімделіп отырған.
«Нәтижесінде 65 адам зардап шекті. Келтірілген залал көлемі 250 миллион теңгеден асты. Ақшаны алаяқтар өз қажетіне жұмсап, ал несиелер сол бейкүнә азаматтардың мойнына ілінді», — деп хабарлады Бас прокуратура.
Қылмыстық топтың мүшелеріне ҚР ҚК-нің 190-бабы («Алаяқтық») және 262-бабы («Қылмыстық топ құру және оған қатысу») бойынша айып тағылып отыр. Барлық күдіктілер қамауға алынған, іс материалдары сотқа жолданды.
Айта кетейік, бұған дейін сарапшылар елімізде автокөлік саудасы саласындағы алаяқтық схемалар саны күрт артқанын ескерткен еді. Олардың ішінде жалған жарнама, жасырын кепілдіктер және көлікті бөтен адамның атына рәсімдеу секілді тәсілдер жиі кездеседі.