RUS
SMARTNEWS.KZ басылымының хабарлауынша, Жетісу облысы Алакөл ауданында Үшбұлақ ауылы маңында орналасқан шошқа шаруашылығы туристер тарапынан айтылған шағымнан кейін жабылды. Бұл туралы ҚР Экология және табиғи ресурстар министрлігі мәлімдеді.
Министрліктің мәліметінше, биыл 21 сәуірде әлеуметтік желілерде Үшбұлақ ауылдық округіндегі «Qaratas» шаруа қожалығы маңынан жағымсыз иіс шығып жатқаны туралы бейнематериал тараған. Осыған байланысты уәкілетті органдар шұғыл түрде тексеру жүргізген.
22 сәуірде ферма иесі бұл шошқалар туристерге көрсету үшін уақытша әкелінгенін, ал олар өсіру мақсатында болмағанын айтып, жануарларды алып кеткен. Экология департаменті мен табиғат қорғау полициясы бұл бұзушылықтың жойылғанын растады.
Сонымен қатар, Жер ресурстарын басқару департаменті де жоспардан тыс тексеру жүргізіп, жердің мақсатына сай емес пайдаланылып, заңсыз құрылыс салынғанын анықтады. Нәтижесінде ферма басшысына әкімшілік жаза қолданылып, заң бұзушылықтарды жою туралы ескерту берілді.
2025 жылғы шілде айында оқиға орны қайта тексеріліп, шошқа шаруашылығы толық тоқтатылғаны және табиғи ландшафт қалпына келтірілгені анықталды. Туристер жиі серуендейтін Қарабұлақ өзенінің жағасы бұрынғы келбетіне қайта келген.