RUS
SMARTNEWS.KZ басылымының хабарлауынша, Алматы облысында иттің талауына түсіп, ауыр жарақат алған 10 жастағы Максимнің отбасы баспаналы болды. Бұл туралы қоғам белсендісі Мира Бейсен әлеуметтік желіде хабарлады.
Оның сөзінше, 80 шаршы метрлік төрт бөлмелі үй көпбалалы Головачевтер әулетіне арнайы қорға жиналған қаржы есебінен алынған.
«Естеріңізде ме, Хамеевтің иті талап, өлім аузынан қалған 10 жасар Максим? Міне, сол баланың отбасына үй алынып берілді. Баланы аман алып қалған Серікбек Сақайбеков марапатталды.
Қазір Максимнің жағдайы жақсарып келеді. Жақында ауруханадан шығады. Әлі ұзақ оңалтудан өтуі керек. Бірақ халқы қолдаусыз қалдырмайтынына сенемін. Бұл — жұртымның жүрегінің кеңдігі», — деп жазды Бейсен.
Белсендінің айтуынша, отбасының тұрмысы ауыр, жалдамалы пәтерде тұрады, үлкен ұлы мүгедек, анасы жұмыс істемейді.