RUS
SMARTNEWS.KZ басылымының хабарлауынша, Шымкент қаласы әкімінің орынбасары Руслан Берденовке жасалған қастандыққа қатысты қылмыстық іс сотқа өтті. Бұл туралы қалалық соттың баспасөз қызметі мәлімдеді.
Айыпталушы Ернар Жиенбайға ҚР Қылмыстық кодексінің 24-бабы 3-бөлігі («Қылмысқа дайындалу және қылмыс жасауға оқталу») және 99-бабы 1-бөлігі («Адам өлтіру») бойынша айып тағылған. Іс Шымкент қаласының қылмыстық істер жөніндегі мамандандырылған ауданаралық сотына түсті. Алдын ала тыңдау 28 шілде күні сағат 10:00-ге белгіленді.
Еске салайық, 21 сәуір күні әкімдік ғимаратының маңында Руслан Берденовке белгісіз біреу шабуыл жасап, пышақтаған. Ол ауыр жарақатпен ауруханаға жеткізіліп, шұғыл ота жасалған. Екі аптадан кейін ауруханадан шыққан.
Күдікті Ернар Жиенбай оқиға орнында ұсталып, сол күні қамауға алынған. Ол бұған дейін «Тұрғын үй Шымкент» ЖШС директорының міндетін атқарған.
Қазіргі уақытта Руслан Берденов еңбек демалысында. Оның міндетін уақытша қала әкімінің бірінші орынбасары Қуаныш Асылов атқарып отыр.