RUS
SMARTNEWS.KZ басылымының хабарлауынша, Павлодар облысында 48 жастағы ауыл тұрғыны 13 жастағы өгей қызын зорлағаны үшін өмір бойына бас бостандығынан айырылды. Бұл туралы Orda.kz жазды.
Сот үкіміне сәйкес, ол ҚР Қылмыстық кодексінің 120-бабы 4-бөлігі («Кәмелетке толмаған баланы зорлау») бойынша кінәлі деп танылды. Сот оған өмір бойына бас бостандығынан айыру және педагогикалық қызметпен айналысу құқығынан өмір бойына айыру жазасын тағайындады. Жазасын қауіпсіздігі барынша жоғары мекемеде өтейді.
Қылмыстық іс жабық сот отырысында қаралды. Іс 2025 жылдың наурыз айында қозғалған. Жәбірленуші – өгей қызы – мектептегі психологқа жүгініп, ұйқы кезінде қорқынышты түстер мазалайтынын айтып, бұл күйді өгей әкесінің зорлығымен байланыстырған. Қыздың айтуынша, оқиға 2024 жылдың желтоқсанында болған.
Процесс барысында айыпталушы кінәсін мойындап, жыныстық қатынас қыздың «өз еркімен» болғанын алға тартқан. Алайда сот бұл мәлімдемені теріске шығарды. Судья Нұрлан Айтбаевтың айтуынша, қыз қорқып, ешкімге ештеңе айта алмаған. Сот, сонымен қатар, қылмыстың бірнеше мәрте қайталануын және ер адамның мас күйде болғанын ауырлататын жағдайлар деп бағалады.
Сот үкімі әлі заңды күшіне енген жоқ. Ол апелляциялық тәртіппен қайта қаралуы мүмкін.