Айзаттың өліміне қатысты істі зерттеу үшін Руслан Өтепбай Талдықорғанға барды

SMARTNEWS.KZ басылымының хабарлауынша, белгілі журналист Руслан Өтепбай Жетісу облысында болған жантүршігерлік оқиғаға байланысты тергеу материалдарын зерттеу үшін Баласаз ауылына барғанын хабарлады.

22 маусым күні Жетісу облысы, Ақсу ауданына қарасты Баласаз ауылында 32 жастағы Айзат Жұманова қайтыс болды. Тергеу нұсқасына сәйкес, оның күйеуі әйелін арқанмен байлап, жылқыға байлап сүйреткен. Ауыр жарақат алған Айзат Жұманованы ер адам алдымен ата-анасының үйіне апарған, кейіннен ауруханаға жеткізген. Алайда медициналық көмек тым кеш көрсетілгендіктен, дәрігерлер оның өмірін сақтап қала алмады.

Бұл оқиға қоғамда кеңінен талқыланып, әлеуметтік желілерде үлкен резонанс тудырды. Марқұмның туыстары әділдік талап етіп, журналистерден көмек сұраған.

«Айзат Жұманова 22 маусымда қайтыс болды. Оқиға орнына келіп, марқұмның жақындарымен кездестім. Ата-анасы әділдік іздеп, шырылдап жүр. Олардың айтуынша, Айзат күйеуінің қатыгез әрекетінен көз жұмған. Осы істі жан-жақты зерттеу үшін арнайы келдім. Егер үлгерсем, бүгін кешке YouTube-арнама толық репортажды жариялаймын», — деп жазды Руслан Өтепбай.

Журналист марқұмның қайын атасы Қайраттан да сұхбат алған. Ол оқиғаның нақты қалай болғанын білмейтінін айтты:

«Айзатты сол күні көрмедім. Әйелім екеуімен бірге кеткен. Қыздың қорылдап жатқанын айтты. Кикілжің болғаны анық. Бірақ ондай жағдай бір жақты болмайды ғой. Маған келін болып түскенге дейін не болғанын білмеймін ғой, дұрыс па?...», — дейді Қайрат.