RUS
SMARTNEWS.KZ басылымының хабарлауынша, Абай облысында педофилия бойынша айыпталған ер адамға өмір бойына бас бостандығынан айыру жазасы тағайындалды. Бұл туралы Abainewskz жеткізді.
Облыстық сотта бұл іске байланысты жабық сот отырысы өтті. Айыпталушы – 9 жастағы балаға қатысты бірнеше рет жыныстық сипаттағы зорлық әрекеттерін жасаған ер адам. Іс материалдарына сәйкес, 2024 жылдың тамыз айында ол Шар қаласында әйелі жағынан туысқан кішкентай жиен қызын бірнеше мәрте азғындаған.
Сотта мемлекеттік айыптаушы оған бірнеше қылмысы үшін өмір бойына бас бостандығынан айыруды сұрады. Жәбірленуші баланың анасы да осы жазаға қолдау білдірді. Ал айыпталушы өз кінәсін толық мойындамай, соттан ақтауды сұраған.
Алайда сот оның кінәсін дәлелденген деп тауып, өмір бойына бас бостандығынан айырды. Сонымен қатар оған балалармен жұмыс істеуге өмір бойына тыйым салынды.