«Стипендиясын директор алып отырған»: Шымкентте студент 4 жыл бойы грантта оқығанын білмеген

SMARTNEWS.KZ басылымының хабарлауынша,Шымкенттегі Оңтүстік Қазақстан Жоғары медицина колледжінің студенті 4 жыл бойы мемлекеттік грант негізінде оқығанын тек оқу аяқталған кезде ғана білген. Бұған қоса, студентке тиесілі шәкіртақы да жылдар бойы төленбеген. Бұл ақпаратты заңгер Айгүл Орынбек Facebook парақшасында мәлімдеді.

Заңгердің айтуынша, колледж түлегі Надира Тимурқызы Шаукатова грант негізінде оқығанын алғаш рет одан естіген. Тағы бір маңызды жайт — студент ресми тіркеу бойынша мүлде басқа мамандықта оқыған болып шықты.

«Надира колледжге алғаш түскен сәтінен бастап ай сайын 21 мың теңге, ал соңғы курстарда 40 мың теңге көлемінде шәкіртақы алуы тиіс еді. Бірақ төрт жыл бойы ол бірде-бір теңге алмаған. Бұл қаржыны колледж директоры Эльмира Дүйсенқызы өз пайдасына пайдаланған болуы мүмкін», — деп жазды Айгүл Орынбек.

Осыған байланысты Stan.kz тілшісі Шымкент қалалық білім басқармасына сауал жолдаған. Басқарма бұл жағдайға өз тараптарынан қатысы жоқ екенін мәлімдеді.

«Студенттерді қаржыландыру Шымкент қалалық білім басқармасы арқылы жүзеге аспайды. Медициналық мамандықтар бойынша білім беру бюджетін облыстық денсаулық сақтау басқармасы жүргізеді. Қазіргі таңда бұл жайтқа қатысты аталған басқарма мен құзырлы органдарға ресми хат жолданды. Тиісті тексерулерден кейін шәкіртақыны нақты кім алғаны анықталады. Ал колледж студенттері тек оқу бағдарламасын толық меңгерген жағдайда ғана мамандығы бойынша диплом алады», — деп хабарлады басқарма өкілдері.